5:15 PM
007
Gindagsa sang mga bisita kag mga tumalan-aw ang pagbukas sang Veterans Exhibit nga gintiguluhan “War of our Father…A tribute to the Filipino Freedom Fighters”, sang tinalikdan nga Enero 4 sa City Hall Lobby. Ini ang gintambungan sang mga bisita nga naghalin sa Department of History, mga empleyado sang gobyerno lokal,Veterans Bank kag pipila ka mga veterans sang World War II sa diin sila ang nagapabilin nga buhi nga testigo sang herorismo sang mga Filipino sa panahon san World War II.
Ang nasambit nga exhibit ang ginpagunahan sang Veterans Bank in partnership sa gobyerno lokal sang Koronadal.Ini ang may tinutuyo nga mapakita sa subong nga henerasyon ang mga kaagi kag eksperyensya nga naaguman sang mga Filipino sa ila pakigbatok sa mga mananakop nga Hapones. Pinaagi sa mga litrato kag film showing, makit-an kag maapresyar sang mga tumalan-aw ang mga nangin bayad sang kahilwayan nga naeksperyensyahan sa pagkakaron.
Samtang sa nasambit nga exhibit, gindugok sang mga tumalan-aw ang isa sa mga buhi nga bitirano nga si Jose Enrijo, 96 yrs.old kag residente sang Barangay GPS, syudad sang Koronadal. Wala pagduha-duha nga gintudlo ni Enrijo ang iya litrato nga nakadisplay sa exhibit area sa diin solo siya nga nakuhaan kapot ang isa ka armas. Suno pa sa iya, sa nasambit nga litrato siya nagapangidaron sang 16 anyos sang siya naghimbon sa grupo sang mga guerilla.
Nahibaluan nga ang nasambit nga exhibit ang magalawig tubtob Enero 16. Isa man sa atraksyon sang exhibit ang mga antigo nga kagamitan kag armas luthang sang mga sundalo kag guerilla.
Sa pihak nga bahin, nangin emosyonal naman si Sgt. Menandro Lapuz sa ginpatigayon nga Wreath Laying kag commemoration program para sa 17 ka Martyr sang Koronadal. Si Lapuz ang lone survivor kag bata sang isa sa mga martyr ang naghatag sang iya response message sa diin iya ginpaabot sa mga opisyales sang gobyerno lokal ang iya kalipay sa rekognasyon kag pagpasidungog nga ginhatag sa 17 ka mga Martyr pinaagi sang isa ka ordinansa. Ginpangunahan naman sang 17 ka mga Layco ang pagbasbas sang lubnganan sang mga Martyr nga nahamtang sa KCES-I.
Samtang sa programa, ginhangkat ni City Mayor Peter B. Miguel ang katawhan nga mangin modern heroes sa subong nga henerasyon pinaagi sa pakigbahin sa mga programa sang gobyerno nga may kaangtanan sa pag-atiman kag pagpreserbar sang palibot kag kinaiyahan.
Gindagsa naman sang mga estudyante nga luyag makabalo sang history sang Koronadal ang ginpatigayon nga Handurawan, isa ka theatrical presentation nga ginpapelan sang Hinugyaw Dance Troupe. Kinalain sang nasambit nga palabas sa mga naliligad amo ang pagbahin sini sa 7 ka episode sa diin ini ang ginpanami kag mas ginpabongga pa.
Ang Handurawan ang gindihon agud sa paghatag pagpasidungog sa mga local heroes sang syudad kadungan sa selebrasyon sang 72nd Foundation Anniversarey kag 12th Hinugyaw Festival.
more pictures: click
