KATAWHAN, HINUGYAW NA!

Naghinugyaw na ang mga katawhan sang syudad kadungan sa pagbukas Sang 72nd Foundation Anniversary kag 12th Koronadal Hinugyaw Festival sang Enero 6, 2012. Nangin “keynote speaker” sa nasambit nga aktibidad amo si Cong. Lorenzo “Erin” Tañada, III sang Quezonn Province. Kadungan sang iya pag-abot, isa ka “press conference” ang ginpatigayon sa diin nangin sentro sang topiko amo ang “impeachment” ni Justice Secretary Renato Corona, health services kag isyu sa mina kag elektrisidad sa pungsod.

Samtang, antes pa man ang pag-abot ni Tañada, una na nga ginpatigayon ang Veteran’s Exhibit sa City Hall lobby nga nag-umpisa sadtong Enero 4. Makit-an diri ang nagkalain-lain nga laragway sang mga beterano nga ginakabig nga baganihan nga amo naman ang nag-ula sang ila dugo agud maangkon ang kahilwayan sang pungsod sa diin ang syudad sang Koronadal ang isa sa mga nakabenisyo sini. Ginsundan man ini sang Wreath Laying sa 17 Martyrs’ Shrine sa diin ginpatigayon ang 17 gun salute subong man “candle and flowers offerings.”

Sa pihak nga bahin, nangin “colorful” man ang ginpatigayon nga motorcade nga ginpartisiparan sang mga government officials sang syudad upod ang nagkalain-lain nga government kag non-goverment organizations (NGOs), media kag mga pribado nga sector.

Ginsundan ini sang Settler’s Night sa diin isa ka stage play ang ginpatigayon nga gintawag nga ”Handurawan.” Katuyu-an sini indi lamang panumbalikan ang mga nagliligad apang agud ma-edukar ang mga katawhan sang syudad ilabi na sa bahin sang mga kabataan may kaangtanan sa maragtas sini. Samtang, opisyal man nga nag-umpisa ang Kasadyahan sa Park nga magalawig tubtub Enero 10. Samtang, wala naman sang rason nga indi makabugtaw sang temprano ang mga katawhan agud magpartisipar sa mga aktibidades bangud sa pagpamukaw sa mga ini adlaw-adlaw.

Sa pihak nga bahin gindagsa naman sang nilibo ka mga tawo ang ginpatigayon nga celebrity night featuring ang Aegis Band, isa ka kilala nga banda halin sa Manila.



visit: Koronadal Hinugyaw Festival