2:57 AM
007
 |
| Add caption |
Andam nga magabulig ang tanan nga mga School Principals sang pribado kag pampubliko nga eskwelahan sa syudad sang koronadal para sa pagbantay sang mga estudyante nga nalulong sa Internet nga amo ang isa sa mga rason nga madamo sang mga estudyante ang naguba sa ila pagtuon.
Sa isa ka pagsinapol nga ginpatawag ni City Mayor Peter B. Miguel, ginpahayag sang mga principals nga isa sa daku nga ginaproblemahan subong nga panahon ang mga Internet Cafés/stations nga nagabayular sa ordinansya nga nagadumili-an sa pagsulod ukon paghampang sang computer sang mga estudyante sa elementarya kag High School umpisa alas 7 sang aga tubtob alas 5 sang hapon.
Ginhatagan punto sang mga ini nga basi sa mga na drop-out nga mga estudyante, 50 porsyento ang nalulong sa computer gaming. Luwas sini madamo pa sang ginpabutyag ang nasambit nga mga school principals nga makabig nga isa daku nga upang sa bahin sang edukasyon.
Bangud sini, ginpahayag ni Mayor PBM nga mas pabaskugon pa ang pagpatuman sang Ordinance No. 5 series of 2006 nga naga regulate sa tanan nga mga Internet Café sa syudad sang koronadal bangud sa madamo nga mga insedente nga nagin kabangdanan sa pagkaguba sang edukasyon sa mga kabataan.
Hana-una na nga nagpatigayon sang inspeksyon sa mga Internet Cafés ang Internet Operators Regulatory Board ukon IORB Inspectorate Teams kag madamo sang mga nadakpan nga mga Internet Cafés nga nagbayular sa ordinansa kag tigayon nga napinaltihan.
Isa sa nangin rason kung nga-a nagpatawag sang pagsinapol si Mayor PBM sa tanan nga mga Internet Operators para ipalab-ot ang nagkalain-lain nga mga reklamo kag problema nga nagtuhaw may kaangtanan sa ila operasyon dungan sa pag awhag sang kooperasyon kag tumanon ang mga pagsulondan nga ginapatuman para sa kaayuhan sang tanan.
Plano man ni Mayor PBM nga mag mag tukod sang Task Force nga amo ang magatutok sa implementasyon sang nasambit nga ordinansya, magpatigayon sang Information Education Campaign ukon IEC sa tagsa ka mga eskwelahan sa sydad agud nga dugang pa mapa-intende sa mga estudyante kag mga ginikanan ang mga probisyon sang nasambit nga layi.
By: Henry M.
