8:48 PM
007
Ginpasiguro ni Mayor Peter B. Miguel nga estable ang Peace and Order sang syudad sang Koronadal. Suno sa iya, apisar pa nga may pila ka pagpanabotahe nga nagluntad sang mga nagliligad nga mga senimana, apang wala naman sang kamatuuran nga nangin ghost city ang Koronadal. Gindugang pa sini nga padayon nga buhi ang negosyo tagsa ka gab-i bangud madamo sa gihapon sang mga katawhan nga nagalinagaw. Gin-athag man sini nga tatlo lamang ang opisyal nga napagkit sa blotter report sang Koronadal City PNP may kaangtanan sa nagluntad nga carnapping. Apang ginakonsiderar man sini ang ikaapat nga kaso matapos nga nasapwan nga patay sa probinsya sang Sultan Kudarat ang isa ka pumuluyo sang syudad.
Gindugang pa ni Mayor PBM nga indi magpati sa mga kutsu-kutso sa palibot bangud lunsay wala sang kamatuuran ang mga ini. Ginatumod sang alkalde ang nagalinapta nga text messages may kaangtanan sa kidnapping. Nahibalu-an nga naglapta ang balita angot sa pagpang-kidnap sang mga kabataan agud kuhaan sang kidney kag mata. Ginpaklaro sang alkalde nga bilang isa ka doctor, imposible ang amo nga butang bangud suno pa, nagakinahanglan sang nagaka-igo nga laboratory kag preservation antes makuha ang mga internal organs sang isa ka persona.
Nahibalu-an nga personal mismo nga gina-chekyar kag ginalibot ni Mayor PBM ang syudad tagsa ka gab-i. Ini agud personal man sini nga makit-an ang matu-od-tu-od nga situwasyon. Samtang, gindayaw man sini ang aktibo nga partisipasyon sang Barangay Peacekeeping Teams (BPATs) sa diin nagapanguna nga partner sang Koronadal City PNP para sa pagmentinar sang peace and order.
