4H Club sang Brgy. Concepcion, aktibo sa programa angot sa Herbal medicine kag Tea Making

Aktibo sa pagpatigayon sang programa angot sa Herbal kag Tea Making ang 4H Club sang Brgy. Concepcion, ini matapos nabatunan sang nasambit nga club ang financial loan assistance halin sa Department of Agricultur-Agricultural Training Institute (DA-ATI) nga nagakantidad sa P50,000.00.Nahibaluan nga una ginrelease ang P25,000 bilang pauna nga loan assistance para sa Herbal medicine planting and making project sang grupo. Pipila sa mga herbal medicines amo ang Moringga, Sambong, Lagundi kag Tormeric okon Luyang Dilaw.
Sang damlaglamang, ginrelease naman ang dugang nga P25,000 bilang financial loan assistance para bag-o nga proyekto nga Herbal Tea making sang grupo. Ang nasambit nga Club ang ginapamunuan ni Engr.Danielle F. Apostol bilang volunteer leader kung sa diin kabahin sang iya lote ang iya gintanyag agud pagatamnan sang mga nasambit nga Herbal Plants.
Sa nahibaluan, ang 4H Club isa ka National Program nga aktibo nga ginaimplimintar sang subong nga administrasyon pinaagi sa City Agricultures Office. Ang nasambit nga Club ang ginalakipan sang mga out-of-school youth nga may edad 10-30 anyos kag ginapamunuan sang isa ka volunteer leader kag set of officers. Tinutuyo sang nasambit nga programa nga madiskobre ang potensyal sang mga kabataan sa bahin sang mga livelihood kag income generating programs agud mamahimo sila nga pradaktibo nga pumuluyo kag takos nga makabulig sa ila ginikanan. Ini isa man ka pamaagi nga mapasako ang mga kabataan agud sila makalikay sa mga hindi maayo nga impluwensya sang palibot kasubong sang mga ginadumili nga droga.
Sa pagkakaron ang 4H Club sang Brgy.Concepcion ang ginalakipan sang 30 ka miyembro lakip na ang mga opisyales kag isa sa masiling nga pinakaaktibo nga 4H Club sa ciudad sang Koronadal.