11:15 PM
007
Mixed emotion ang nabatyagan ni Ginoong Noel R. Manabe sang nabaton sini ang Apolinario Mabini Award bilang Most Outstanding Disabled Filipino in Mindanao. Ang nasambit nga award ang personal nga ginhatag ni Presidente Gloria Macapagal-Arroyo sa Heroes Hall, Malacanang Palace sadtong Agosto 6, 2008. Ini paagi naman sa rekomendasyon sang Technical Education and Skills Development Authority (TESDA) Provincial matapos nga nakita ang pinasahi nga kinaiya kag paghimakas sini.Nangin balasehan sang TESDA Provincial sa pagrekomenda kay Manabe amo ang sensiro sini nga pagbulig sa kapareho sini nga Persons with Disability (PWD) paagi sa pagpangita sang mga livelihood trainings. Magluwas sini, gindayaw man si Manabe bangud wala sapayan sang iya situwasyon, natapos sini ang kurso nga Bachelor of Science in Mathematics sa Sultan Kudarat Polytechnic State College paagi sa PESFA Scholarship.
Samtang, magluwas sa nasambit nga award, nangin bronze medalist man ini sa cooking contest, isa ka National Skills Competition sa Metro Manila, sadtong Disyembre 3, 2010.
Sin-o bala si Noel R. Manabe antes pa man ini nangin awardee? Kasubong sang iban nga persona nga nadulaan man sang pagla-um sa kaugalingon kag dismayado sa iya situwasyon, makatatlo ini ka beses nga nagpakamatay sa edad nga 12, 14 kag 16 anyos.
Wala ginkahuya ni Manabe ang pag-ako angot sa iya plano kuntani nga pagpakamatay paagi sa paghigot sa li-og, paglaslas sang pulso kag iban pa nga suicidal attempt. Nahibalu-an nga si Manabe ang isa ka biktima sang poliomitis sa edad nga sais anyos samtang naka-recover naman sa edad nga nueve anyos. Ini ang rason sang iya pagsuprer sang tuman nga depression.
Sa pihak nga bahin, sa bulig sang City Social Welfare and Development Office (CSWDO) sa pagpamuno ni CSDWO Mary Jane Martha Gabucan kag iban pa nga mga Non-Government Organizations (NGO’s), amat-amat nga nakabangon si Manabe sa iya depression.
Sa karon, si Manabe ang isa sa mga PWD nga dapat mangin ehemplo bangud ang iya kapisan kag kabakas ang mabudlay tupungan. Bag-o gid lamang, nakakuha naman ini sang suporta halin sa pila ka organisasyon nga amo naman ang naghatag sang artificial leg para sa mga PWD nga wala sang tiil.
By: Bic F. Manato
