11:44 PM
007
Lubos na nga gina-implementar sang Lokal nga pamunu-an sang syudad sang Koronadal ang programa nga gulayan sa ugsaran ukon Gardeners Club. Ang nasambit nga programa ang nadihon base naman sa P.E.T.E.R. Agenda ni City Mayor Peter B. Miguel sa idalom sang ”Malusog at Protektadong Mamamayan.” Ini ang ginpa-idalom naman sa talatapan sang City Nutrition sa pagpamuno ni City Nutrition Action Officer Veronica Daut.
Ginhatagan punto ni Mayor PBM nga ang pagdihon sang Gardener’s Club ang isa ka maayo nga paagi agud maangkon sang syudad ang supisyente nga utanon. Katuyu-an naman sini agud masolbar ang problema sang malnutrisyon sang mga kabataan ilabi na sa bahin sang mga pre-schoolers.
Samtang, agud maporsige ang 27 ka mga barangay sa pagpatuman sang amo nga programa, ginmandu-an ni PBM ang tanan nga mga punong barangay nga magpasar sang isa ka executive order. Bangud sini, lima ka mga major officers sa tagsa ka barangay ang ginpili agud magpanguna para sa implementasyon sang Gardener’s Club.
Nakaangkon naman sang pagdayaw ang nasambit nga programa halin sa Department of Agriculture (DA) Sec. Proceso Alcala. Kaangot sini, isa ka complete set of gardening tools upod ang pinakbet seeds ang ginhatag ni Alcala sa syudad paagi sa iya representante nga si Mr. Nonoy Jonsay. Nangin benepisyaryo naman sini amo ang mga kabataan nga naga-eskwela sa pampubliko nga eskwelahan sang elementary. Lubos naman ang pagpasalamat ni Mayor PBM sa suporta nga ginpakita ni Alcala sa amo nga programa.
By: Bic F. Manato
