11:19 PM
007
Una diri, ginpahayag ni City Mayor Peter B. Miguel nga negosyo ang sentro sang selebrasyon tagsa ka anibersaryo sang syudad. Ini agud hatagan importansya ang mga negosyante ilabi na yadtong mga ordinary okon small-medium enterprise. Nahibalu-an nga ang negosyo festival, ang isa lamang ka pauna nga aktibidad sa ginapatigayon nga Koronadal Grand Sale nga nagalawig sa bug-os nga bulan sang Oktubre. Kaangot sini, bagsak presyo ukon nagahatag sang diskwento ang kadamuan nga mga establismento komersyal sa syudad. Ang Koronadal Grand Sale ang isa ka ordinansa nga yara na sa ikaduha nga tuig matapos nga ginlunsar ini sang tuig 2010.
Fun Run
Masadya nga ginbuksan ang 1st Negosyo Festival sang syudad sang Koronadal paagi sa isa ka Fun Run nga nag-umpisa kag nagtakop sa Jaycees Avenue. Kaangot sini, nangin madinu-agon ang amo nga fun run nga ginpartisiparan sang kapin 7,000 ka mga indibidwal nga lunsay nakasuksok sang t-shirt nga yellow.
Lubos naman ang pagpasalamat ni City Mayor Peter B. Miguel sa tanan nga mga nagpasakop, subong man sa komitiba nga nag-organisar. Nahibalu-an nga nakadesignar sa bug-os nga Sangguniang Panlungsod sang Koronadal ang pag-organisar sang Fun Run. Samtang, ginpangunahan naman ni City Councilor Ellen Grace Subere-Albios ang pagpang-imbitar kag pagpangrehistro sang mga partisipante.
Trade Fair
Sa pihak nga bahin, ginhatagan naman sang pagtamod sa ginpatigayon nga Trade Show ang display/exhibit sang apat ka industriya nga ginlakipan sang motorcycle, swine raising, agri-products & machineries kag one town, one product. Katuyo-an sang nasambit nga Trade show nga mahatagan sang higayon ang mga ini nga ipakita ang ila pag-ugyon para sa isa ka healthly nga kumpetisyon sa patag sang negosyo.
Palengke Festival
Samtang, isa naman ka grandyoso nga kapistahan ang ginpatigayon sa merkado publiko sang syudad Ang 3rd Palengke Festival ang may tinutuyo nga mapabaskog ang komersyo sa sulod sang merkado publiko sa diin isa sa ginhatagan dako nga importansya ang katinlo sang palibot paagi sa pagpatigayon sang Cleanest and Orderly Shed. Kadungan sa pagbukas sang nasambit nga kapistahan ang paglunsar sang 3 ka unit sang digital kilohan ng bayan agud hugot nga maproteksyunan ang interes sang mga consumers.
Nagtakop naman ang nasambit nga selebrasyon paagi sa isa ka beauty and brains competition sa diin 8 ka pares sang mga soltero kag dalaga ang nagpa indis-indis para sa titulo nga Pogi kag Byuti sang Merkado. Antes pa sini, isa ka Palengke Challenge ang ginpatigayon sa diin ang mga kandidato kag kandidata mismo ang nanguna sa pagpamaligya. Dugang pagid nga nagpasadya sa okasyon ang ginpreparar nga salo-salo kag mga parlor games nga ginpartisiparan sang mga stall-owners kag market vendors.
Livelihood Skills Training and Community Service
Nangin madinalag-on naman ang pagtakop sang series of livelihood skills training nga ginpatigayon antes pa man mag-umpisa ang 1st Negosyo Festival. Katuyuan sini agud mahatagan sang dugang nga kinaalam ang mga partisipante partikular sa patag sang Banana Chips Making, Motorcycle Repair Servicing Course Reflexology (Galing Masahista), Household Appliance Servicing, Mobile Phone Servicing, Defensive Driving with Troubleshooting, Balloon Arrangment kag Entrepreneurial Training. Ang nasambit nga mga trainings ang ginpatigayon sang City Government of Koronadal kaupod sang TESDA, DTI, Rotary Club of Marbel, MITC kag KCES II sa diin naglab-ot sa 127 ka mga indibidwal ang tigayon nga nakatapos.
Samtang kasubong sa kinaandan, nagpatigayon man sang 2-day community service sa diin naghatag sang libre nga serbisyo sa publiko ang mga benepisyaryo nga nagradwar. Ini agud ila ma-practice kag ma-apply ang ila tagsa ka natun-an.
Puno sang aksyon kag resistensya ang 1st SIKAD Koronadal Mountain Bike, Road Bike, BMX Challenge matapos nga nagpaindis-indis sang kusog pinaagi sa pagsikad sa kabukiran kag palibot sang syudad ang malapit 400 ka mga Bikers gikan sa nagkalainlain nga club kag individual sa isla sang Mindanao. Ang 1st SIKAD Koronadal ang isa sa mga maaksyon nga atraksyon sa celebrasyon sang 11th Charter Aniversary kag 1st Negosyo Festival sang syudad. Ginpasiguro ni Mayor PBM, nga sa masunod nga tuig mangin pungsudnon na ang amo nga kumpitisyon bangud plano sini nga paga imbitahan ang mga sikat nga mga biker sa pungsod agud nga magpasakop. Mga Categories sang 1st SIKAD Koronadal MTB-Elite,MTB-Master, MTB-Veterans, MTB-Juniors/Seniors, MTB-Fat Boys, MTB-Ladies, Roead Bike, Fun Ride-A, Fun Ride-B, Fun Ride-c, BMX, Midget.
Volleyball Tournament
Nangin maaksyon naman ang hinampang sa tunga sang 17 ka hubon, 10 halin sa men’s division kag 7 halin sa women’s division, nga nagpartisipar sa Volleyball Tournament. Ini makaligad nga mabaskog ang kompetisyon sa diin desidido ang mga challenger nga agawon ang titulo halin sa mga nangin champion sang nagligad nga tuig sa diin hugot nga gindepensahan sang mga ini. Magluwas sa mga kinaandan nga mga awards, ginhatagan man sang pasidungog ang hubon nga may yara best uniform kag ang mga atleta nga nangin Most Valuable Player halin sa tagsa ka division. Mahibaluan nga ang Volleyball Tournament ang isa sa mga tuigan nga aktibidad nga ginapatigayon tagsa ka Charter Anniversary umpisa sang tuig 2008.
Motocross Competition
Maaksyon kag makahalawathawat ang 2nd Mayor PBM National Invitational Motocross Competation nga ginpartisiparan sang mga national riders halin sa nagkalin-lain nga lugar sa pungsod. Ang nasambt nga motocross competition ang isa sa mga nagtipon sang linibo ka mga katawhan agud saksihan ang tumalagsahon nga kumpitisyon
Mismo si Mayor PBM ang nagpasakop sa nasambit nga kompitisyon sa bahin sang executive category kaupod si Director Angelito Magno sang NBI Region XII kag ang iban pa nga mga dinapit nga bisita. Ang mga national riders nga nag partisipar amo sanday Jovi Saulog halin sa Manila, Ambo Yparcon sang Palawan, Kimboy Pineda kag Jessi Pineda sang Tagum City, Bornok Magusong sang Davao City, mag utod nga Joven kag Jeven Legrada sang Agusan, Dondon Capilitan sang Digos City, Michael Rivera sang General Santos City, kag Ted Conde sang Osamis City.
7-Aside Football
Tuman naman ka hugot ang nangin engkwentro sang naglab-ot sa 16 ka teams nga nagpasakop sa 7-Aside Football open kag 35 years old up category nga ginhiwat mismo sa atubangan sang City Hall sang syudad kadungan sa selebrasyon sang 11th Charter Anniversary sang syudad.
Sa open category gindeklarar nga champion ang Real Marbel Football Club matapos patumbahon sini ang Gensan-Sarangani Football Club-A. Samtang sa 35 years old up category naman tuman ka mainit ang championship game sang Real Marbel Football Cub kag Gensan-Sarangani Football Club-C tubtob nga lag lab-ot sa free kick nga kung sa diin nag champion ang Real Marbel Football Club sa score nga 3-2.
Ang mga nagpasakop nga mga Football Clubs amo ang NDMU, STI, KNCHS IBED, Gensan-Sarangani A,B kag C, Real Marbel, Tboli, Budoy, Bo.5, Bo.7, CLUBX B kag C kag ang City Hall Football Club.
Green Film Festival
Samtang, leksyon kag kalingawan ang napalab-ot sang pelikula nga “The Last Rain Forest” yadto sa mga nagtambong sang Green Film Festival. Nahibalu-an nga ginpalab-ot sang amo nga pelikula ang mensahe may kaangtanan sa pagtatap sang kagulangan subong man ang importansya sang mga kakahuyan. Gintambungan naman sang mga empleyado sang City Hall subong man sang mga imbitado nga mga estudyante halin sa nagkalain-lain nga eskwelahan. Ang “The Last Rain Forest” ang isa ka animation film nga naglawig sa sulod sang isa ka oras kag tunga. Una diri, nagpatigayon sang lecture sanday Engr. Jaime Flores, Chief Geologist sang Department of Environment And Natural Resources-Mines and Geosciences Bureau (DENR-MGB) kag Bai Soraya Meditar, Chief of Legal Environment and Education Division sang amo man nga ahensya.
Jobs Fair
Samtang hindi naman magnubo sa 1000 ka mga job seekers ang nahatagan sang oportunidad nga makapangita sang trabaho sa ginpatigayon nga Jobs Fair kung sa diin 300 sa mga ini ang maswerte nga na hire-on-the-spot. 24 ka mga lokal nga ahensya kag 21 nga overseas ang nagpartisipar agud makabulig sa mga nagapangita sang ubra. Kadungan naman sa nasambit nga aktibidad ang pagpatigayon sang Online Skills Registration sa diin ang tanan nga narehistro ang may dako nga tsansa nga ma-match sa mga ahensya nga nagakinahanglan sang mga skilled workers bangud ang mga ini ang yara na sa Skills Registry System. Nakatawag naman sang libre ang mga persona nga may kaparyentihan nga naga ubra sa abroad paagi sa ginpatigayon nga Libreng Tawag sa mga OFWs. Ini nga mga aktibidades ang ginpatigayon kaupod ang DOLE 12, OWWA 12, Globe Telecom kag STI.
1st Negosyo Forum
Nangin sentro sang 1st Negosyo Forum ang mga topiko angot sa mga bag-o nga Economic Opportunities, Economic Forecast sang Region XII kag Peace and Order Status sang syudad sang Koronadal. Ini ang ginpartisiparan sang hindi magnubo sa isa ka gatos nga mga negosyante sa diin ginpresentar sa mga ini ang nangin Development sang syudad. Mga isyu naman angot sa negosyo, mga oportunidad kag kasamtangan nga ekonomiya sang syudad ang gintalakay sa ginpatigayon nga open forum. Sa pihak nga bahin, 52 ka mga establisemyento ang nagpartisipar sa 2nd Koronadal Grand Sale nga magapadayon sa bilog nga bulan sang Oktubre.
Business Night
Samtang, dyesesyete (17) ka mga establisyemento kag indibidwal ang ginpasidunggan sa ginpatigayon nga Prosperous Business for the Masses Night. Ang nasambit nga mga awardees ang makabig nga madinalag-on sa patag sang Negosyo. Isa naman ka special award ang ginhatag kay anay City Mayor Fernando Q. Miguel bilang pagpasidungog sa iya dako nga kontribusyon sa kauswagan sang syudad sang Koronadal. Nangin sentro sang nasambit nga okasyon ang paglagda sang isa ka sisterhood agreement sa tunga ni City Mayor Peter B. Miguel kag City Mayor Sherwin Gatchalian sang Valenzuela City, Metro Manila.
Dog Show
Doble ang numero sang mga partisipante sa ginpatigayon nga Dog Walk halin sa old City Hall pakadto sa Rizal Park kumpara sang nagligad nga tuig. Nahibaluan nga kapin sa 250 ka mga dog owners halin sa syudad kag kaiping nga mga banwa ang nagpartisipar sa tuigan nga aktibidad. Ini ang ginsundan naman sa isa ka Dog Fashion Show sa diin 28 ka mga ido ang nagpasundayag kag nagrampa suot ang ila colorful costumes. Samtang 26 naman ka mga dog owners ang nagsali sa photo contest sa diin ang ila nangin modelo amo ang ila tagsa ka mga sagod nga ido.
Kapehan, Motorcade, Anniversary Program and Foam Party
Matawhay kag madinalag-on nga nagtakop ang finale sang 11th Charter Anniversary kag 1st Negosyo Festival sang syudad sang Koronadal. Ang nasambit nga aktibidad ang ginbuksan paagi sa isa ka Anniversary Mass sa Christ the King Cathedral takna 5:30 sa aga bilang pagpasalamat. Ini ang gintambungan ni City Mayor Peter B. Miguel, upod ang iya First lady Consuelo Miguel kag mga empleyado sang City Hall.
Ginsundan naman ini sang Anniversary Program takna 4:00 sa hapon paagi sa isa ka motorcade nagikan sa City Hall padulong sa Jacees Avenue. Nangin dinapit nga bisita si Albay Governor Joey Salceda nga naghatag man sang inspirasyon sa mga katawhan. Sa pamulung-pulong ni Salceda, ginhatagan sini pagtamod ang tinaga nga “Kanami Koronadal”. Suno sa iya, nagakadapat gid ang nasambit name branding sa mga Koronadaleños bangud sa paghugpong. Gindayaw man sini ang maberde nga palibot sang syudad kag ang mataas nga pwesto sa National Achievment Test (NAT). Ginhatagan man sini dako nga punto ang pagdumili sa pagmina bangud nakita sini ang negatibo nga epekto kasubong sang naexperyensyahan sa ila lugar sa Albay.
Samtang, magluwas kay Salceda, yara man ang presensya ni South Cotabato Gov. Arthur Y. Pingoy, Jr. kag Tacurong City Mayor Lina Montilla.
Sa pihak nga bahin, daw kasubongg naman nga ginhaw-as ang mga katawhan sa ila tagsa ka puluy-an paduilong sa Jaycee Avenue. Ini agud saksihan ang masadya kag gina-angan-angan ngafoam party. Daw kasubong naman sa isa ka picnic sang bug-os nga pamilya ang pagdagsa sang mgakatawha sang nasambit nga aktibitad. Nahibaluan nga naglab-ot tubtob sa kaagahon ang pagsinadya sa foam party.
Una diri, ginpatigayon man ang 2 ka gab-I nga live band kag Koronadal Woodstock, isa ka konsyerto nga nagalawig sa sulod sang 24 oras. Kasubong sang kinaadman nga pagtilipon, gintumpukan man sang mga katawhan ang amo nga mga aktibidades.
