8:36 PM
007
 |
Grupo sang mga kabataan nga nadakpan sa sulod sang Internet station sa diin sila gin-imbitahan sa City Legal Offic sa City Hall, para sa isa ka sworn statement. |
Hugot nga ginpaandaman ni City Mayor Peter B. Miguel ang mga internet stations nga naga-operar sa syudad sang Koronadal. Suno sa iya, magapanabat ang mga internet operators nga nagabayolar sang ordinansa sang syudad.
Ang nasambit nga pagpaandam ang may kaangtanan sa pagdakop sang mga kabataan sa sulod mismo sang internet station samtang may yara sang klase. Nahibalu-an nga napagkit sa City Ordinance No. 5, series of 2006 ang hugot nga pagdumili sa mga internet operators sa pagbaton sang mga kabataan umpisa 7am-5pm, Lunes tubtub Biyernes. Magluwas sini, ginadumili man ang pag-akomodar sang mga kabataan pasado 10pm, indi lamang sa adlaw sang Lunes tubtub Biyernes apang lakip man sa weekends kag mga holidays.
Madumduman nga siyam ka mga kabataan nga nagabutho sa Koronadal National Comprehensive High School (KNCHS) ang nadakpan sa akto sang ila manunudlo makaligad naglibot ini sa mga internet stations. Gilayon naman nga ginrespondihan sang Internet Operator Regulatory Board (IORB) matapos nga ginpalab-ot sa City Information Office ang nasambit nga problema.
Sa karon, ginaplastar na sang IORB sa pagpanguna ni Mayor PBM ang mga tikang nga nagakadapat himu-on agud matapna ang nagadata nga internet operator violators. Una diri, handa man nga ipasirado sang alkalde ang mga stations nga padayon nga nagasupak sa ordinansa.
