9:08 PM
007
Nabaton na sang Koronadal City PNP ang panibag-o nga dugang nga patrol car kag duha ka motorsiklo. Ini agud mapabaskog pa gid ang kapasidad sang mga kapulisan sa pagtapna sa mga malain nga elemento nga nagaluntad sa syudad. Madumduman nga una na nga ginhatagan pagtamod ni City Mayor Peter B. Miguel ang mga nagapanguna nga kinahanglanon sang Koronadal City PNP makaligad nga nakit-an sini ang kakulang sang salakyan sang amo nga ahensya. Nahibalu-an nga naga-isahanon lamang sadto ang patrol car sang syudad sa diin madugay na nga ginbakal sa idalom sang administrasyon ni anay City Mayor Fernando Q. Miguel.
Kaangot sini, aktibo nga naga-ronda ang bag-o nga patrol car sang City PNP sa sulod sang 24 oras bilang isa man sa mga obligasyon sini. Samtang, nagapati si Mayor PBM nga mapadasig pagid ang paglagas sang mga malain nga elemento nga nagapanghalit sa syudad bangud sa bag-o nga salakyan sang kapulisan.
Sa pihak nga bahin, may panibag-o na nga itsura ang ambulansya sang syudad. Nahibalu-an nga nakapagkit ang itsura ni National Hero Dr. Jose Rizal matapos nga ginpanas ang laragway ni Mayor PBM. Madumduman nga nangin isyu sadto ang pagbutang sang laragway sang alkalde sa nasambit nga ambulansya. Ini bangud man sa isa ka memorandum circular nga ginpaguwa ni Pres. Benigno Semeon “Noynoy” Aquino sa diin nagadumili sa tanan nga mga opisyal sang gobyerno sa pagbutang sang ila laragway, pangalan ukon anuman nga mga tinaga nga nagasimbolo sang ila gahom.
Una diri, gin-admiter ni Mayor PBM nga wala ini sang ihibalo sa nasambit nga memorandum circular bangud wala ini nakabaton sang kopya naggikan sa Department of Interior and Local Government (DILG).
