9:43 PM
007
Ginpangunahan ni City Mayor Peter B. Miguel ang isa ka tree growing activity bilang isa sa mga aktibidades sang Regional Development Council XII (RDC) Week celebration. Ini ang ginpatigayon sa mabukid nga bahin sang Sitio Dungan Lahek, Barangay Saravia, nga ginpartisiparan sang hindi magnubo sa isa ka libo katao halin sa nagkalain-lain nga Government kag Non-Government Organizations sang Rehiyon Dose.
Bag-o ang pagpananom, isa ka malip-ot nga programa kag briefing ang ginpatigayon sa Dungan Lahek Elementary School sa diin ginpalab-ot sang alkalde ang iya bug-os nga pagpasalamat sa pagpatigayon sang nasambit nga aktibidad sa syudad Koronadal. Nahibaluan nga ang Adopt a Mountain Project ang isa sa nangin prayoridad sang iya administrasyon. Isa man ka MOA signing sa tunga sang City Government, land owners kag Barangay Council ang ginhiwat para sa tayuyon nga implementasyon sang programa.
Matapos ang pagpananom, isa naman ka opening program ang ginpatigayon sa bahin sang DepEd XII sa diin nangin dinapit nga bisita si RDC XII Chairperson kag General Santos City Mayor, Hon. Darlene Magnolia R. Antonino Custodio. Sa iya mensahe ginhangkat ni GenSan Mayor Custodio ang tanan, nga makigbahin sa pagkab-ot sang isa ka tinutuyo, ang pagdihon sang mga oportunidad nga makabulig sa pagpalambo sang kalidad sang pangabuhi sang mga pumuluyo sang Rehiyon Dose.
Ang 3 ka adlaw nga selebrasyon ang ginlakipan sang People’s Day sa diin nagkalainlain nga serbisyo kasubong sang Medical & Dental Services, NSO s ervices, driver’s licensing seminar, illegal drugs awareness and advocacy on agri-pinoy programs, jobsfair, legal services, T.I.N. registration, land titling and launching of Regional Development Plan, ang gindul-ong sa publiko. Dugang pagid nga nagpasadya sa okasyon ang nagkalainlain nga mga sports activities kasubong sang basketball, volleyball, table tennis kag badminton.
